Am

Mae Neuadd Brangwyn yn ganolfan boblogaidd bywyd cymdeithasol a diwylliannol yn Abertawe. Fe'i defnyddir yn aml ar gyfer priodasau, derbyniadau, seremonïau gwobrwyo, digwyddiadau a chyngherddau. Mae Neuadd Brangwyn yn un o dirnodau Abertawe. 

Mae ei leoliad cyfleus yn agos iawn i draeth tywodlyd Bae Abertawe, a gellir cyrraedd canol dinas Abertawe ymhen deg munud ar gerdded ac ymhen pum munud ar y bws.

Yn y gorffennol, mae Neuadd Brangwyn wedi croesawu nifer o actau rhyfeddol, gan amrywio o Deep Purple, The Police, Queen i Kiri Te Kinawa. Mae Pavarotti wedi recordio yno, yn ogystal â Cherddorfa Ffilharmonig Llundain a Manic Street Preachers, i enwi ychydig yn unig.

Mae'r Frenhines, y Tywysog Philip a'r Tywysog Siarl wedi ymweld â Neuadd Brangwyn ynghyd â sawl aelod arall o'r teulu brenhinol, prif weinidogion, y Fam Theresa, a sêr ffilmiau megis Michael Sheen a Joan Collins. Mae llawer o enwogion chwaraeon rhyngwladol fel Ian Botham wedi cynnal ciniawau ac areithiau yn y lleoliad dros y blynyddoedd.

Mae Neuadd Brangwyn hefyd wedi cynnal digwyddiadau niferus a ddarlledwyd ar y teledu fel cynadleddau pleidiau gwleidyddol, Question Time y BBC, The Antiques Roadshow, T4 Live, a llawer o seremonïau gwobrwyo a chiniawau.

Rydym hefyd wedi cynnal sioeau blodau, ffeiriau crefftau, ffeiriau cardiau post, ffeiriau teganau, ffeiriau elusennol, seremonïau dinesig megis rhyddid y ddinas, yn ogystal â phrydau bwyd Indiaidd, dathliadau'r Flwyddyn Newydd Tsieineaidd, gornestau paffio a snwcer.

Mae Neuadd Brangwyn yn cynnig llawer o ystafelloedd ar gyfer cynadleddau a chyfarfodydd. Ni waeth a ydych am gynnal cynhadledd fawr, diwrnod hyfforddi, gweithgareddau meithrin ysbryd tîm neu adloniant corfforaethol, gallwn gynnig ystafelloedd amrywiol eu maint i ddiwallu eich anghenion. Mae naw ystafell ar gael, o ystafelloedd pwyllgor bach ar gyfer hyd at 16 o gynadleddwyr yn eistedd o gwmpas bwrdd, i Neuadd Brangwyn ei hun sydd â seddau arddull theatr i 1070 o bobl.

Ar ôl gwaith adnewyddu gwerth miliynau o bunnoedd, mae Neuadd Brangwyn yn meddu ar dechnoleg fodern ac yn sicrhau gwasanaeth unigryw o safon uchel.